Felly, rydych wedi defnyddio golygydd HTML (fel un o'r rhai y soniwyd amdanynt ar y dudalen Celfi Rhyngrwyd yn adran y Manion Ychwanegol) i greu eich Gwefan. Ond beth wnewch chi nawr? Sut mae copïo eich gwefan o'ch disg galed i'ch lle personol ar y We i bawb gael ei gweld?

Wel, yn gyntaf oll mae angen i chi Ysgogi eich lle ar y We, yna bydd angen i chi ddefnyddio cleient FTP i anfon eich ffeiliau i'ch lle personol ar y We.

Mae'n hawdd ysgogi eich lle personol ar y We, a dim on unwaith mae angen ei wneud. Pwyntiwch eich Porwr (e.e. Internet Explorer) at http://www.cymru1.net/cymraeg/signup/activate.php (neu cliciwch yma)

Byddwch yn gweld sgrîn yn gofyn i chi deipio eich enw defnyddiwr a chyfrinair. Eich enw defnyddiwr yw rhan gyntaf eich cyfeiriad e-bost (e.e. os mai dafydd@cymru1.net yw eich cyfeiriad e-bost, yna eich enw defnyddiwr yw dafydd.

Eich cyfrinair yw'r cyfrinair a wnaethoch chi ddewis wrth ymuno, ac mae'r un fath â'ch cyfrinair mynediad i e-bost, webmail, a mynediad deialu ac ati.

Unwaith y byddwch wedi rhoi'r manylion, dim ond clicio ar “Activate” sydd raid. Byddwch yn gweld neges yn dweud eich bod wedi ysgogi eich lle personol ar y We yn llwyddiannus, a gallwch nawr ddefnyddio yr hyn sy'n cael ei alw'n cleient (neu raglen) FTP i anfon eich tudalennau i'ch lle ar y We (gwelwch isod)

Ystyr FTP yw “File Transfer Protocol”, sef protocol mae pob gwefan yn ei ddefnyddio i ganiatáu i gwsmeriaid lwytho eu ffeiliau i fyny (anfon) i'w lle ar y We. Dim ond cleient yw FTP sy'n deall y protocol hwn ac mae wedi ei ddylunio'n benodol at lwytho i fyny (anfon) a hefyd at lwytho i lawr (derbyn) ffeiliau o Wefannau.

Rhai enghreifftiau o gleient FTP yw CuteFTP, WS-FTP a FTP Voyager. Cliciwch ar enw'r rhaglen i fynd i Wefan cyhoeddwr y rhaglen. Gallwch hefyd weld mwy o raglenni FTP trwy ymweld â www.download.com a chwilio am FTP. SYLWCH: Mae gan rhai golygyddion HTML gyfleusterau FTP ynddynt. Os felly y mae gyda'ch golygydd HTML, ni fydd angen i chi lwytho cleient FTP i lawr ar wahân.

Defnyddio eich cleient FTP i gysylltu â'ch Lle personol ar y We.

Er mwyn cysylltu gyda'ch lle personol ar y We, bydd angen i chi ddweud y tri pheth canlynol wrth eich cleient FTP:

1) Enw / cyfeiriad y gweinydd FTP

2) Eich enw defnyddiwr / enw cyfrif FTP

3) Eich cyfrinair FTP

Mae enw / cyfeiriad y gweinydd FTP y dylech ei ddefnyddio yn dibynnu ar eich enw defnyddiwr Cymru 1, a bydd yn edrych rhywbeth yn debyg i www.eichenwdefnyddiwr.cymru1.net. Er enghraifft, os wnaethoch chi ddewis enw defnyddiwr dafydd wrth ymuno, a chyfeiriad e-bost felly o dafydd@cymru1.net, yr enw gweinydd FTP ddylech ddefnyddio fyddai www.dafydd.cymru1.net

Mae eich enw defnyddiwr FTP yn debyg i'ch cyfeiriad e-bost, ond gyda “.” (atalnod llawn) yn lle “@”. Felly os mai dafydd@cymru1.net yw eich cyfeiriad e-bost, eich enw defnyddiwr FTP fyddai dafydd.cymru1.net

Mae eich cyfrinair FTP yr un fath â'ch cyfrinair e-bost, webmail a deialu.

NODYN PWYSIG:

Ni allwch ysgogi na llwytho ffeiliau i fyny i'ch lle personol ar y We oni bai eich bod yn cysylltu â'r Rhyngrwyd gyda gwasanaeth Cymru 1 Cyswllt. Mewn geiriau eraill rhaid i chi ddefnyddio rhifau deialu Cymru 1 (0844 535 1740) i gysylltu â'r Rhyngrwyd cyn y gallwch ysgogi neu lwytho i fyny i'ch lle personol cyfrif Connect ar y We.